Сургалт

Хүн бүхний амьдралын замнал өөр өөр ч бүгд л аз жаргалтай, сайн сайхан амьдралыг хүсэн мөрөөддөг. Гагцхүү зүгээр л мөрөөдөөд суугаад байсан уу, түүнд хүрэхийн тулд өдөр бүр шаргуу хөдөлмөрлөсөн үү гэдгээр хүссэн амьдралаа бүтээсэн эсэхийг нь тодорхойлж болох юм.

Ямар ч ажил мэргэжилтэй байхаас үл хамааран аз жаргалтай амьдралыг цогцлооход дур сонирхолтой, өөрийгөө хөгжүүлэх, бас урам зориг авах зүйлсийг хийх нь хэн бүхэнд таатай сайхан санагддаг. Үүний тод жишээ бол гар урлалын аль нэг төрлийг сонирхох, чөлөөт цагаа зөв өнгөрүүлэх, зав чөлөөгүй бужигнаан дунд өөртөө цаг гаргах, өөрийгөө мэдрэх, аз жаргалтай хором мөчүүд юм.

Зарим хүмүүс боддог байх л даа, уг нь би зураг зурахыг хүсч байна, гэхдээ надад авъяас байхгүй, юм оёж сурмаар байвч ерөөсөө оёж үзээгүй болохоор чадахгүй байх, эсвэл гарын дүйгүй болохоор ямар нэгэн бүтээлч зүйл хийх боломжгүй гэж…

Ямар нэгэн алхам хийж, түүнийг өөртөө итгэлтэйгээр хийж чадах хүртлээ оролдож, хичээж үзсэн үү? Оёсон ч болохгүй болохоор нь олон дахин ханзалж, нэхсэн нэхмэлээ хөвөөд дахин дахин нэхсэн үү? Зураг зурахаар оролдож үзэхдээ нэлээдгүй их цаасыг бохирдуулан хаяж, ямар нэгэн гар урлал хийсэн ч санаанд тань нийцэхгүй байв уу? Ерөөсөө бүтэлтэй болж өгөхгүй нь, би ер нь чадахгүй юм байна, надад авъяас л алга, тиймээс урлаж бүтээнэ гэдэг бүтэшгүй юм гэж бодсон юм биш биз? Хүн бүхэн яг эндээс эхэлдэг, гэхдээ бүтэмжтэй эсвэл бүтэмжгүй болох нь таны оюун санаанаас, өөртөө итгэх итгэлээс, уйгагүй оролдлогоос хамаарна. Тодорхой хэлвэл зүрх сэтгэлдээ шинийг эрэлхийлэх сэдэл, түүнийг ажил хэрэг болгох “бүтээлч урлан” байгуулсан уу үгүй юу гэдгээс шалтгаална гэсэн үг.